Често пати во електроничарската практика се јавува потреба од предзасилувач со одредени карактеристики и намена. Тогаш помалку искусните електроничари започнуваат со потрага по соодветна шема која ќе ги задоволи поставените барања. Тоа одзема многу време а често пати потрагата не вродува со плод или пак изборот паѓа на некоја конструкција која само делумно ги задоволува поставените барања. Сите овие проблеми лесно можат да се решат доколку се познава теоријата за операциските засилувачи и методите за проектирање на електронски конструкции. Во таа насока во текстот што следи ќе биде прикажан еден универзален аудио предзасилувач реализиран со операциски засилувач заедно со упростен метод за негово проектирање и упатства за самоградба.