Magnat Vector 22

Германската фирма Magnat е малку позната на нашиве простори, иако станува збор за угледна фирма, со (главно) добри уреди. Оние кои ги читаат германските Hi-Fi списанија сигурно го забележале заштитниот знак на Magnat стрип-цртеж на глава од смешно-агресивен булдог, со слоган "sound mit biss" (буквално: "звук со гриз"), односно по наше "звук со заби".

Звучната кутија е со убав и елекантен дизајн, одлично е изработена и делува многу скапо. Страниците и задната плоча се облепени со добра пластична имитација на фурнир, во убава нијанса на црешово дрво. Предната плоча е зајакната со дополнителна плоча од медијапан дебела 28 mm (!), со заоблени рабови, а отворите за драјверите се прецизно направени. Обоена е во црна боја, која одлично се вклопува со впечатливата метално-сива боја на фланшите на драјверите, која е во иста нијанса како керамичката калота на високотонецот, која е заштитена со метална мрежичка. Шасијата на бас-звучникот е пластична, иако има метално-сива боја, материјал кој сè почесто се експлоатира во поново време, бидејчи на тој начин се елиминирани магнетните загуби кај класичните железни шасии, а цената е далеку помала од алуминиумските шасии. Бас-рефлекс цевката, со дијаметар од само 45mm е поставена од задната страна.

Имедансата е декларирана како 4-8 оми, нелогично и непотребно – можеле да кажат дека е 6 оми. Декларираната осетливост е 90dB/2,83V/1m, со фреквентен опсег од 35Hz до 35kHz (најверојатно се мисли на -10dB). Според мојот стар, добар обичај повторно нема да ја кажам синусната (или музичката) моќност на звучникот, бидејќи тоа воопшто не е важно.

Цената на еден пар Magnat Vector 22 е 400 германски марки.

Tannoy M2

Tannoy долг низ години има успех со Mercury серијата на евтини звучници, чие ново продолжување е M серијата. Сите три модела од М серијата добија одлични оценки во англиските Hi-Fi списанија, а особено се истакна Tannoy M1 (прочитајте го наиот слеп слушен тест во ЕМИТЕР 10/98).

Во англиските списанија поголемиот моделк М2 беше испофален за длабоките басови и неутралниот звук. Ќе видиме...

Кутијата на Tannoy M2 е солидно изработенам, а предната плоча е дополнително засилена со уште една плоча дебела 12mm, во светла нијанса на имитација на дрво, која е во добар контраст со црните звучници и останатите страници облепени со пластична фолија – имитација на фурнир со црна боја. Номиналниот дијаметар на бас звучникот е 165 mm, а дијаметарот на импрегнираната хартиена мембрана е 117 mm. Мембраната има инверзна (конкавна) покривна калота и е многу слична на мембраната од од Magnat Vector 22. Високотонецот има калота од импрегнирана ткаенина со дијаметар од 25mm. Бас-рефлекс цавката е монтирана на задната страна. Димензиите на кутијата се 380x204x273mm. Колку вати е? Тоа е сосема небитно.

Цената на еден пар Tannoy M2 е 390 марки.

Со професионалниот мерен уред CLIO ја измерив аплитудно-фреквентната карактеристика на двата звучника. Мерењето е извршено во оската на високотонецот на далечина од 2 m, што приближно одговара на реалните услови на слушање.

Жирито за слепиот слушен тест го сочинуваа еден професионален тон-мајстор и еден аудиофил, истите од претходните наши слепи слушни тестови. Оценувањето на квалитетот на звукот од страна на само еден слушател секогаш носи ризик да се нагласува индивидуалниот вкус – затоа најдобро е да се има повеќечлено жири. Слушниот тест беше изведен со CD плеерот Rotel RCD-971 и засилувачот Rotel RA-971.