Во изминатиов период видов толку текст, фотографии и информации за Теохаров аудио, што навистина се борев со дилемата дали на читателите на Еми­тер им е потребен уште еден осврт на портфолиото на овaa нашa надежнa high-end аудио мануфактура.

Идејата беше да се направи осврт на технолошки освежената линија на звуч­ници од топ-рангот на Теохаров, односно пасивните звучнички системи од лини­јата „C" (Ц). Неуморниот дух и инвентив­ност на одговорниот конструктор во Теохаров повторно го подигнаа и онака високиот критериум за квалитет на се­ри­јата Ц, а тој не штедејќи се, мошне живописно ми ги пренесе своите импре­сии за многубројните унапредувања нап­ра­ве­ни со последната едиција на прес­тиж­ната серија која е составена од три модела, сите двосистемски, со една или две мид-бас единици и соодветна висо­ко­тонска единица, сè од престижната серија Илуминатор на данскиот произво­дител Scan Speak.

Навидум сè е како и претходно, но тука почнува да се расплетува приказ­ната за унапредениот дизајн на свртни­ците и повисокото ниво на употребени делови во нив (Janzen Superior/Silver Z-Cap кондензатори, на пример), унапредени звучнички терминали, ексклузивен сет на елементи за декуплирање од подот од Viablue, повисоко ниво на завршна обра­бот­ка итн... Аха... интересно, но не нео­че­ку­вано, иновативно, ништо ново под сонцето, особено не од Веселин кој во секоја пригода не пропушта да нагласи дека врвниот квалитет и бескомпро­мисен дизајн на уредите е императив на Теохаров.

И тогаш, б-у-у-м: „... знаеш, кабинет­от е асиметричен (за сите модели од серијата Ц) и нема ниту една паралелна страна, но во новата серија е направен од сендвич од три композитни матери­ја­ли, односно соединет HDF и ORNAMAXTM  со композитна фолија, внат­ре е матрична решетка. На тој начин резонантна фреквенција на кабинетот е околу 1 Hz...” Полека, полека...