Кога се зборува за млазните ловечки авиони тие се грубо поделени на пет "генераци", во зависност од тоа во кое време се произведени, од нивните технички карактеристики и филозофијата која стои зад начинот на нивната примена.
Како прва генерација се сметаат млазните ловечки авиони кои се појавиле при крајот на Втората светска војна, до приближно 1950 година. Тие биле до неколку стотини километри на час побрзи од клипните ловечки авиони од Втората светска војна, но како и кај нив главно оружје било стрелачко оружје: топови и митралези. Втората генерација на млазни ловечки авиони веќе биле побрзи од звукот, а главно вооружување биле ракети воздух–воздух со инфрацрвено или радарско наведување. Оваа генерација ги опфаќа авионите кои се појавиле во педесеттите години. Третата генерација ги опфаќа авионите кои се појавиле од 1960 година до почетокот на седумдесеттите години на 20 век. Повеќето од овие авиони можеле да се користат и за воздушни борби и за бомбардирање, а за двете намени можеле да користат наведувани оружја. Четвртата генерација на ловечки авиони се карактеризира на воведување FBW и HOTAS системи, како и со дигитална контрола на моторите, а традиционалните аналогни инструменти се заменети со повеќефункционални дигитални дисплеи. Овде спаѓаат авиони кои се појавиле од 1980 година до средината на деведесеттите години. Петтата генерација на авиони ја карактеризира намалената радарска и инфрацрвена "видливост", способност за крстосување со надзвучна брзина, интеграција на податоците од различни сензори, како и мрежа за измена за податоци меѓу пријателските авиони, земски радари, бродски радари и друго. Засега единствен ловечки авион од петтата генерација кој се наоѓа во оперативна употреба е американскиот Ф 22 Раптор. Прототипот на Рапторот полетал во 1997 година, а авионот влегол во употреба во 2005 година.
Во меѓувреме, тајно, во 2002 година е распишан конкурс за нов руски ловечки авион со стелт карактеристики. Како носител на проектот е избрано конструкторското биро Сухој. Постоењето на авионот е објавено во 2007 година кога командантот на Руското воено воздухопловство Александар Зелин објавил дека развојната фаза на ПАК ФА е готова и почнува изградбата на прототиповите. По неколку одложувања, првиот прототип полетал на 29 јануари оваа година. Вториот прототип се очекува да полета при крајот на оваа година. Овие два прототипа немаат вграден радар и систем за контрола на оружје. Овие два система ќе бидат вградени во следните два прототипа кои се очекува да полетаат следната година. Освен трупот, останатите компоненти на ПАК ФА се базираат на соодветните компоненти на Су 35 БМ.