Повозрасните читатели сигурно се сеќаваат на SBI серијата проекти на звучни кутии со Dynaudio компоненти објавени во хрватското списание SAM, во 1981 година. Од денешна гледна точка (сега е лесно да се правиме паметни) нивната прва серија беше апсолутно непотребно искомплицирана со свртници од симетричен четврти ред (24 dB/oct.). Во втората серија SBI/II проекти (во 1984 год.) тие отидоа во друга крајност, форсирајќи свртници од прв ред (6 dB/oct.), кои не се секогаш најдобро решение – како што покажав со подобрувањето на SBI проектот Selektor 100, во ЕМИТЕР 5/99 – "Операциона сала: Звучници од нашите читатели (5)".

Една голема грешка во SBI/II серијата  беше употребата на бас-среднотонскиот звучник Dynaudio 24W75 во несоодветно мала компресиона звучна кутија од само 32,5 литри (проектите SBI 5/II и Mentor II). Кај Dynaudio 24W75 измерив многу висок Qts параметар (Qts=0,87), па во таква звучна кутија се добива Qtc=1,5, што е премногу: басовите се недефинирани, матни, продолжени и без резолуција, а средните басови се пренагласени. Поради високиот Qts параметар, Dynaudio 24W75 е совршен кандидат за TL звучна кутија.

За Dynaudio 24W75 проектирав TL звучна кутија со која добив одлични резултати, подобри отколку во компресиона звучна кутија со истиот волумен. Подобрувањето не е во квантитетот, туку во квалитетот на ниските тонови – за оваа TL кутија измерив фантастични Qtc=0,57! Напоменувам дека овој проект не е оптимален за бас-звучникот Dynaudio 24W75, бидејќи нарачателот на оваа звучна кутија инсистираше на што помал волумен на кутијата. Затоа ова TL звучна кутија ја проектирав за што подобар квалитет, а квантитетот на басовите беше на втор план.

Кутијата е изработена од mediapan дебел 22 mm, со дополнителна внатрешна преграда за вкрутување, така што кутијата воопшто не резонира дури и при гласна музика. Тежината на празната звучна кутија е 40 kg! За да се избегнат дифракционите појави, горната површина на фланшата од високотонецот е во иста рамнина со предната плоча на звучната кутија. На фотографијата е прикажана нефинишираната звучна кутија. Предните рабови од кутијата можат да се заоблат. Дампирањето е изведено со “волна” од полиестер.

Амплитудно-фреквенциската карактеристика која се добива со новопроектираната свртница

Звукот е одличен: прецизен и авторитетен бас, проѕирни и чисти  високи тонови, со аналитични средни тонови кои се само малку повлечени – најверојатно заради потесната дисперзија од широката мембрана на бас-среднотонецот.