Улогата на овој уред е со помош на импулсно-ширинска модулација да го контролира напонот со кој се напојува светилката приклучена на него. Ваквиот уред уште се нарекува и димер, а нашиот уред првенствено е предвиден за управување на светилки кои се напојуваат со еднонасочен напон од 12V, но може да се употреби и за управување на греач или некој сличен уред. Потребата од оваа контрола најмногу се чувствува кога за осветлување се користи акумулатор или батерија која има определен капацитет кој треба да го штедиме бидејќи бргу ќе се потроши. Со употреба на овој уред на светилката и испорачуваме помалку енергија од батеријата и на тој начин се продолжува траењето на складираната енергија во батеријата. Предноста на овој уред, во споредба со сличните на него, е што коефициентот на загубена енергија во него е многу мал и неговата ефикасност изнесува околу 90%.