Инфрацрвените (IR) сензори се оптички сензори кои го детектираат делот од спекатарот на електромагнетно зрачење со бранова должина во опсегот помеѓу 4 и 20 µm или таканаречената инфрацрвена светлина. Оваа светлина ја емитуваат загреаните тела и доминантната бранова должина на зрачењето кое потекнува од овие тела зависи од нивната температура. Без да навлегуваме во теории ќе разгледаме само еден пример. Нека едно парче железо постепено го загреваме во затемнета просторија. Се до температура од околу 600°C не можеме да видиме дека парчето свети. Дури над оваа температура забележуваме дека тоа свети со темноцрвена боја. Ако продолжиме со загревање на парчето,тоа станува портокалово, па жолто се до бело-жолто на температура од околу 1000°C. За разлика од човечкото око, IR сензорите реагираат на тела кои зрачат со многу пониски темпертури вклучително и човековото тело и телата на животните. IR сензорите реагираат на топлотниот флукс - енергија што потекнува од телото на објектиот кој доаѓа на нивната површина.
Ако телото на човекот го разгледуваме како тело што зрачи тогаш човековта кожа е површината која зрачи. Интересно е што таа има доста голема способност на зрачење од над 90%. Овој факт оди во прилог на ефикасната употребата на пасивните IR сензори (PIR сензори) за детекција на луѓе.