Програмот за обработка на фотографии кој го поседувам има неверојатен избор на филтри за секаква намена. Што ќе ми е повеќе? Само да ми се претураат во мојата фотографска торба?!?
Навистина, програмите за обработка на фотографиите или т. н. "светла комора" даваат големи можности на ова поле. Тие, со соодветна обработка, некоја лоша фотографија можат да ја направат да изгледа добро. Замислете тогаш што можат да направат со некоја добра фотографија! Да биде подобра? Тоа сигурно, но дали тоа е доволно истата да биде извонредна? Не би рекол! Еден од битните предуслови за извонредност на една фотографија претставува техничката беспрекорност, а таа не може да се постигне во "светлата комора" без техничка беспрекорност на снимениот материјал. Со други зборови, снимениот материјал треба да има одредени квалитативни атрибути за истите да можат да се потенцираат со програмите за обработка на фотографиите. Изгубените информации како "прегореното" (преекспонирано) небо или подекспонираните сенки не можат со никакви волшебства да се надоместат, нив едноставно ги нема!
Значи, уште при снимањето треба да "собереме" доволен број релевантни информации за да можеме истите соодветно да ги обработиме. За да ја оствариме оваа цел, во голема мерка можат да ни помогнат филтрите. Постојат повеќе видови филтри и секој од нив има соодветно дејство при соодветни светлосни услови. Така, со нив можат да се намалат големите разлики во осветлувањето, да се балансираат или да се променат боите, да се пренесе дел од, за нашето око, невидлив спектар или да се создадат одредени светлосни ефекти. Сите тие имаат и еден заеднички атрибут кој помалку го забораваме: вршејќи ја својата работа, тие воедно го заштитуваат скапиот објектив од атмосферските влијанија и од мехничките оштетувања.