Ако имате прилика да отворите разводен орман на некоја посовремена машина, наместо голем број електромагнетски склопки за управување со електромоторите, ќе видите убаво дизајнирани кутии со тастери и дисплеј, наречени фреквенциски претворувачи со IGBT (Insulated Gate Bipolar Transistors – транзистори со изолиран гејт). Со овие претворувачи се обезбедува промена на брзината и насоката на вртење, константен момент на оптоварување и потребната заштита на моторот со кој се управува. Во текстот што следува ќе се запознаеме со транзисторите со изолиран гејт, нивната структура и карактеристики, со посебен акцент на нивните прекинувачки својства во споредба со другите активни прекинувачки елементи (биполарни транзистори, тиристори, MOSFET).