Под поимот задно потпирање (и воопшто потпирање на шасијата и/или каросеријата кај превозните средства) се подразбира дефинирање и изведба на врската помеѓу шасијата и задните тркала. Патем речено, истово важи и за предните тркала. Во нашиов случај, за разлика од кај автомобилите, изведбата на оваа врска е многу поедноставна со оглед на фактот дека се работи за крута (неподвижна) врска помеѓу шасијата и тркалата. Задното потпирање, во нашиов случај, го претставуваат склоповите влежиштување на задното тркало и погонски вратила. Системот за кочење (мислам на наједноставните, елементарни системи каков што е во нашиов случај) во принцип е составен од три потсклопови. Првиот е т.н. иницирачки дел во кој се создава притисок на маслото во хидрауличната инсталација (се работи за хидраулична сопирачка) и во него спаѓаат главниот сопирачки цилиндар (или едноставно пумпа за кочница) и педалот за сопирање. Оваа проблематика ќе биде разработена во следното четврто и последно продолжение од серијалов, а го именував како Педали. Со вториот дел од системот за кочење се пренесува оваа сила (притисок) до задниот дел од картингот и во него спаѓаат хидрауличните водови (цевки) со сите нивни придружни и сврзувачки елементи. Третиот потсклоп е т.н. извршен дел од сопирачката, или едноставно сопирачка (во потесна смисла на зборот) со кој притисокот се претвора во сила на сопирање и го забавува или го запира возилото. Во овој трет дел од серијалов ќе биде разработен само извршниот дел од системот за сопирање кој, едноставно, го именував како Сопирачка. ....