Во електричната и монтажната шема на напојувачкиот блок (сликите 7 и 8) има грешка во распоредот на изводите на IC1 (LM317). Грешката е во изводите 1 и 2 – тие треба да бидат обратно (1 = ADJ, 2 = OUT). Тоа значи, за колото да функционира потребно е овие два изводи од IC1 на плочката да ги заменат своите места и да се залемат обратно (со вкрстување, а претходно на едниот од нив да се навлече изолаторско цревце за да се оневозможи случајна куса врска меѓу нив). Друго решение е да се нацрта и направи нова ППК на која ќе бидат корегирани водовите за IC1, R1 и R2 (види цртеж).
Се извинувам на сите читатели кои заради оваа грешка имале проблем при реализација на проектот и благодарам на читателот Мартин Гелев, кој ни укажаа на овој пропуст.
А ако се прашувате како е можно да се направи ваква банална грешка, еве ја генезата на проблемот. При реали¬зација на поедноставни проекти (како овој) јас прво ја цртам плочката со фломастер и го изработувам уредот, а потоа правам компјутерски цртеж на ППК за објавување во ЕМИТЕР. При цртањето сум ги измешал изводите 1 и 2, а таа грешка не ја откриле ни во редакцијата потпирајќи се на едноставноста на проектот и на тоа што прототипот си функционира беспрекорно. Очигледно, во иднина ќе треба да го применувам методот "прво компјутерски цртеж, па потоа изработка", кој е посигурен во елиминирање на вакви грешки. А, секако, и повнимателна контрола на сите цртежи, дури и за наједноставните конструкции.