Доколку поседувате матична плоча од постара генерација, многу лесно може да се случи да не поддржи некој понов модел на процесор, мемориски модул, некој периферен уред. Исто така, не е ретка појавата на одредени грешки или аномалии при работата на истата, односно т.н. "багови", што доведуваат до кочење или каква било нестабилност при работата. Ретки, но сепак извесни, се одредени проблеми во функционирањето на Windows XP со некоја специфична хардверска компонента, како нефункционирање на сите компоненти на Windows XP со стариот БИОС. За среќа, овие нуспојави се релативна реткост кај најновите модели на матични плочи, освен отсуството на поддршка на најновите модели на процесори или мемориски модули, која е извесна. Тој проблем се решава со едноставна надградба на БИОС-от, односно со негово репрограмирање и замена со најнова верзија, во која неправилностите се елиминирани. Надградбата на БИОС-от со негова најнова верзија уште се нарекува и ФЛЕШУВАЊЕ. Одлуката дали ќе го надградувате БИОС-от е ваша. Ако се одлучите на тој чекор, да погледнеме како да го сторите тоа на наједноставен и најбезбеден начин.