SSD (Solid State Drive) дисковите за прв пат беа претставени пред околу 25 години. Досега на овој пазар, помалку или повеќе успешно, се претставија повеќе компании, а перформансите на нивните производи се поприлично променливи, но видливо е дека имаат нагорна линија како и тренд на намалување на цената. Сето тоа придонесува за зголемен интерес на пазарот, а гигантот Интел е еден од оние кои одамна гледаат иднина во производство на SSD дискови. Не е тајна дека компанијата во последно време интензивно и сериозно работеше на нова серија SSD дискови, па знаејќи ја големата посветеност на Интел кога работи на своите проекти, како и големите финансии кои ги вложува при тоа, не е чудно што сите со големо нетрпение ги очекуваа резултатите од овој проект. Така, компанијата на пазарот ја претстави својата нова серија X18-M и X25-M SATA SSD дискови базирани на NAND флеш-технологијата, кои се наменети за лаптоп и десктоп компјутери.