Првата светска војна – еден од најужасните периоди во човековата еволуција, претставува своевидна пресвртница во начинот на војување. Во рамки на оваа исклучително крвава војна за прв пат се раѓаат нови родови во состав на армиите – оклопните единици и единиците на воените воздухопловства, кои како родови ќе прераснат во главна движечка сила на модерните армии се до ден-денешен. Двата најмоќни ривали во I светска војна – Франција и Германија ќе бидат пионери во развојот на овие два армиски рода, а особено големо внимание ќе биде насочено кон доминација со воздушниот простор. Француските ловци од I светска војна се покажале како достоен противник на германските ловци и сè до нејзиниот крај ќе бележат забележителен напредок, како во поглед на воздушните победи така и во технологијата која ќе ги движи повисоко, побргу и, секако, поубиствено.