Денеска, речиси и да нема човек кој барем еднаш во животот не летал со млазен авион. Овие извонредни летала, по неполни дваесетина години откако се појавија целосно ги истиснаа од небото воените и патничките авиони со погонска група “клипен мотор СВС – пропелер”, предизвикувајќи на тој начин најголема револуција, не само во транспортот, туку и на начинот на животот на Земјата. А, сето започна кога еден британски и еден германски иноватор, независно еден од друг, почнале да развиваат потполно нов вид погон. Британецот беше Френк Витл (Frank Whittle), а Германецот Ханс фон Охајн (d-r Hans von Ohain). Во стручната јавност и ден-денес не стивнуваат спротивставените мислења кој е вистинскиот творец на турбомлазниот мотор.