Пред сè, да расчистиме една работа – овој текст е првенствено наменет за почетниците и за понеискусните електроничари и “компјутерџии”. Стилот на пишување е приспособен во таа насока. Доколку сте поискусен и/или професионалец и не ве интересира, не читајте го. Или читајте го, но забелешките задржете ги за себе :). Електролитските кондензатори се едни од најчестите причинители на проблеми кај матичните плочи, графичките картички и кај напојувањата. Неможноста да се мине низ POST процедурата, BSOD, одбивањето компјутерот да “запали од прва”, повременото рестартирање и/или ресетирање, мемориски грешки, нестабилност при работењето, варијации на работните напони – сето ова е последица на неисправни кондензатори. Некои од спомнативе симптоми асоцираат и на вирусна активност. Честопати се случувало компјутерот навистина да бил “опседнат”, но и по чистењето, проблемите продолжуваат со истите симптоми. Затоа, пред да се губи време со средување на системот и скенирање/чистење од вируси, мудро е најнапред да се отвори куќиштето и да се погледне во внатрешноста.