Во екот на "студената војна" помеѓу "Истокот и Западот", а особено парирањето во трката за вооружување, најмногу средства се вложувани во воените воздухопловства и воените морнарици. Желбата на двете страни да ја покажат својата воена моќ и на вода и во воздух беше голема. Но за разлика од "Западот" кој имаше и има голема респектибилна воена сила, со своите носачи на авиони (САД, В.Британија и Франција) од повоениот период од Втората светска војна, па до денешен ден, тогашниот СССР беше, и сè уште е, инфериорен во овој аспект. Сакајќи да парира и на ова поле, тогашниот СССР во шеесеттите години од минатиот век, почна со паралелно развивање на два проекта, својот прв носач на авиони и на борбен авион со вертикално полетување и слетување.