Процесот на конструирање се состои од многу различни активности, но доминираат оние од областа на мислењето. Конструирањето, пред сè, е процес на мислење и процес на трансформација на информациите, при што се поаѓа од идеи и потреби, до комплетен опис на техничкиот систем. За да се реализира саканата трансформација, мора, на определен начин, да се дејствува на влезните информации (операнди) со помош и со директното учество на повеќе оператори. Операторите претставуваат сè она со што може да се постигне потребен ефект, т.е. да се оствари саканата трансформација на влезните информации. За остварување на конечниот резултат, важни се многубројни оператори од кои ќе наведеме неколку најважни.