Во првиот број на списаниево во текстот "D/A конвертор" беше прикажана една реализација на популарниот додаток за персоналните компјутери со кој може да се добие навистина квалитетен звук по многу ниска цена. Меѓутоа, при практичната реализација се појавува проблемот за набавка на квалитетни метал-слојни отпорници со мала толеранција кои се неопходни за изработка на конверторот. Ако се употребат отпорници со толеранција од 5% или поголема, квалитетот на добиениот звук е неизвесен и може битно да отстапи од очекуваниот. Затоа во овој напис ќе бидат предложени неколку алтернативни и подобрени решенија базирани на истиот принцип на работа, следејќи ја основната идеја – евтино и квалитетно. Патем ќе биде објаснета и структурата на паралелниот порт на персоналните компјутери, кој го користат сите предложени конвертори.