Квалитетниот "мек" звук кој го нудат засилувачите со електронски цевки е резултат на нивната нелинеарна преносна карактеристика, која продуцира претежно парни хармоници, пријатни за слушање. Тие го обојуваат основниот музички тон правејќи го попријатен за слушање. Но, не секој љубител на "лампашкиот звук" би се втурнал во изработка на скап комплетен ламбов засилувач поради некои тешко разрешливи проблеми, кои се појавуваат кај овие засилувачи. Во прв ред тоа се проблематичниот излезен трансформатор, потоа нужните високи анодни напони, релативно малата излезна музичка снага во компарација со вкупната дисипација на засилувачот итн. Решението, кое ви го предлагаме, нуди итар пат за надминување на сите тие наведени конструкциски проблеми, а сепак го обезбедува "лампашкиот звук". Ви предлагаме градба на аудиоконвертор (предзасилувач) реализиран со само една триода според шемите дадени во прилог. Тој консумира скромно количество енергија и може многу лесно да се вметне во аудиосинџирот. Во склопот е употребена триода, бидејќи таа има значајни предности во споредба со пентодата. Прво триодата има помалку линеарна карактеристика од пентодата, па тоа обезбедува во поголема мера "лампашки" звук. Натаму, двојната триода претставува идеално решение за градба на стереоуред за репродукција бидејќи таа во себе содржи две посебни триоди, па е доволна само една таква двојна триода за покривање на двата канала. Помеѓу сите постоечки типови двојни триоди, најдобар избор е типот ECC 82 (12AU7) бидејќи конверторот работи со многу мало засилување, па употребата на овој тип двојна триода дозволува употреба на низок аноден напон, сè на сè 60V. На тој начин се одбегнуваат сите тешкотии во врска со високите напони и гломазните и скапи трансформатори, кои се појавуваат кај вообичаените засилувачи со ламби. Со тоа конструкциската проблематика на овој предзасилувач (конвертор за лампашки звук) се сведува на исто ниво со конструкциската проблематика кај полуспроводничките склопови, а тоа го прави предложениот склоп многу лесен за градба.