Првата генерација интегрирани аудио излезни засилувачи во мостна спрега наменети за користење во автомобилот, предводена во сега веќе легендарниот TDA1518, како да нè заслепи со своите максимални 24W RMS на оптоварување од 2 Ω па и не баравме повеќе од тоа од еден аудиозасилувач напојуван од 12-те волти од автомобилски акумулатор. Навистина, многу години TDA1518 претставуваше референца и многу експлоатирано решение, како кај производителите на авторадио-касетофони, така и кај градителите-ентузијасти. Денес овие едноставни но моќни решенија со TDA1518 сè уште се присутни во градбите на ентузијастите, иако ова интегрирано коло не се произведува повеќе 10 години! Имено, со појавата на масовно производство на авторадио ЦД-плеери, десетина години наназад, се воспостави една нова, поквалитетна генерација интегрирани аудиозасилувачи за во автомобили предводени со стандардниот TDA8560, кој обезбедува цели 2 x 40 W RMS на оптоварување од 2 Ω што претставува апсолутен максимум што воопшто може да се добие од аудиозасилувач во мостна спрега и напојуван од автомобилски акумулатор. Во моментот се смета дека генерацијата TDA856x (TDA8560, 8563, 8566, 8667, 8568 и 8571) се вградува во повеќе од 40 милиони аудиоуреди годишно и нема навестувања дека ќе биде прекинато нејзиното производство во некоја блиска иднина. Ете, затоа и јас одлучив да ви презентирам едно мошне едноставно решение со ова ИК, кое се надевам ќе го привлече вашето внимание.