Со обичната тонска контрола за басови од вашиот засилувач не можете да ја добиете оваа прецизна компензација за природното опаѓање на амплитудно-фреквенциската карактеристика на звучниците, затоа што непотребно ќе ги засилите сите ниски тонови, па и дел од средните тонови. Бас-експандерот е активен филтер со специфични карактеристики со кои се овозоможува проширување на амплитудно-фреквенциската карактеристика на звучниците во делот на басовите, при што долната гранична фреквенција може да се спушти за дополнителна 1/2 до една октава пониско. Бас-експандерот може да се конструира за два различни типа звучни кутии - компресиони (затворени) и бас-рефлекс. За да го нагодите правилно бас-експандерот, треба да ја знаете долната гранична фреквенција на вашите звучници, односно треба да ја знаете резонантна фреквенција на звучната кутија, сеедно дали станува збор за затворена (компресиона) или за бас-рефлекс кутијата. Тој податок ќе ви послужи за да ја пресметате вредноста на некои отпорници во шемата на бас-експандерот. Прочитајте го текстот во рамката од колегата Филевски како да го направите тоа. Откако ќе го прочитате овој проект верувам дека уште утре ќе тргнете во негова реализација. Уредот е едноставен и евтин, а ќе ви овозможи уживање во подлабоки басови испорачани од вашите звучници. Ова е проект кој за малку вложени пари и труд ви враќа многу!