Бесконечното вселенско поле со речиси безброј ѕвезди е посеано и со други галактички објекти со многу спектакуларен облик наречени планетарни маглини, кои како цветови го красат небескиот простор. Тие настануваат од облаци од гас и прашина исфрлени во последното агониско претсмртно издишување на ѕвездите при нивното "умирање". Овие посмртни ѕвездени остатоци имаат многу важна натамошна улога. Имено, тие се суровина од која се раѓаат идните ѕвезди и планетарни системи. Но, тоа што научниците особено ги збунува кај овие маглини се нивните многу различни, чудни и комплекси облици, ако се има предвид дека од пресметките и симулациите произлегува дека нивниот облик треба да биде во форма на правилни сферични меури, кои радијално експандираат во просторот. Наместо тоа, суперпрецизните фотографии, направени од орбиталниот телескоп Хабл, покажуваат светлечки фигури со изненадувачка сложеност на нивниот облик, кој долго време ги збунува научниците. Но, се чини дека една американска научна екипа, под водство на Ерик Блекман (Eric Blackman) ја пронашла причината за таквите чудни облици на планетарните маглини, па ќе го проследиме нивното објаснување во текстот што следува.