При изработка на проекти во самоградба, одреденото техничко решение, заедно со проверката на тоа дали даденото решение "влегува во толеранции" во голема мера паѓа на товар на проектантот, со што му се олеснува работата на ентузијастот што го гради уредот. Тој само треба да ги фокусира своите напори во стекнување работно искуство кое би му овозможило да навлезе подлабоко во проблематиката. Но постојат и проекти кои се фокусирани токму да му овозможат на ентузијастот да ја изрази својата инвентивност во полна мера. Таков е и овој проект, па затоа не ви препорачувам да започнете со реализација на овој уред ако немате доволно искуство во конструирање електронски уреди и/или немате доволно трпение и подготвеност да ги доведете сите параметри "под конец". Бидејќи се работи за проект кој е наменет за напредни ентузијасти и градители на електронски уреди, во оваа пригода нема да се задржувам на основните начела на кои треба да се придржуваме при градба на уреди туку ќе акцентирам некои аспекти на кои мислам дека не им придаваме доволно внимание при реализацијата на голем број апликации.