Доколку во вашето студио (за аудио снимање или радиодифузно) имате поголем број гости, членови на некоја група или слично, честопати се јавува потреба од повеќе пара слушалки. Излезот за слушалки (monitor/phones) од миксетата не може да ги задоволи поставените барања, во смисла на број на приклучоци и доволна моќност за сите пара слушалки. Употребата на надворешен стерео засилувач делумно ќе ги реши проблемите. Но останува уште еден нерешен проблем, а тоа е потребата од индивидуално подесување на нивото кон слушалките. Овој проблем потекнува од тоа што ретко кое студио поседува повеќе пара истородни слушалки. Значи нивните осетливости и импеданси најчесто варираат од еден пар до друг. Ова резултира со нееднакво ниво на репродукција, кое не може да се контролира. Од друга страна пак, секој од гостите во студиото има сопствен став кон нивото на репродукција. Со воведување на засебна односно индивидуална контрола на нивото кон секој пар слушалки, овие проблеми се надминуваат. Значи поаѓајќи од овие барања ќе проектираме засилувач кој ќе има 4 стерео канали со засебна регулација на нивото. Притоа на секој стерео канал ќе може паралелно да се приклучат максимум 4 пара слушалки, меѓутоа контролата на нивото за нив ќе биде заедничка.