При развој на софтвер за најразлични конструкции со микро контролери се јавува потреба од брза проверка на неговата функционалност во пракса. Идејата е програмата што се развива да се префрли од персонален компјутер во програмската меморија на микроконтролерот а при тоа да се избегне програмирање на епром секојпат кога ќе се тестира програмата. Хардверската конструкција за оваа намена треба да исполни неколку елементарни услови: - Брза и безгрешна комуникација со персоналниот компјутер за да бидеме сигурни дека ако програмата не работи како што сакаме грешката е во самата програма, а не во лошата комуникација. - На плочката да има така конципирана програмска и податочна меморија за да може да се задоволат мемориските потреби и на најсложените програми кои ќе се развиваат на неа. - Сите важни изводи од микроконтролерот да се изведени на лесно пристапни конектори за да може според дадената потреба направениот хардвер лесно да се приклучи на матичната плочка. Ако матичната плочка ги исполнува овие услови таа е незаменлив сојузник во развојот на разни конструкции со микроконтролери.