Оние кои имаат богата (или помалку богата) колекција на црни пластични шумечки плочи треба да ги преснимат на DAT рикордер, додека е време. При секоја репродукција грамофонската игла по малку ја гребе плочата и неповратно ја уништува запишаната музичка информација и го зголемува шумот. Ова е докажано со фотографии направени со електронски микроскоп, а може и да се чуе - во тоа секој се уверил. После неколку десетина репродукции, настануваат оштетувања на браздите во плочата, особено ако плочата не се чисти редовно. Многу е чудно што некои особено важни особини и можности на дигиталните уреди воопшто не се спомнуваат во Hi-Fi списанијата (и во некои книги). Кога ќе размислам подобро, можеби и не е така чудно, бидејќи некои фирми и поединци заработија големи пари токму врз основа на таа неинформираност. CD репродукторот не е на слепо (на глуво?) донесен на пазарот, туку е резултат на извршени испитувања и анализи од голем број на слушни тестови. Се разбира, тој е и одраз на состојбата на технологијата и електрониката во времето на неговото настанување. Ќе ви ја откријам најголемата и најдобро чуваната тајна: Cross Interleaved Reed-Solomon Coding (CIRC). CIRC е еден од системите за заштитно кодирање на дигиталните сигнали. Тој обезбедува детекција на погрешно пренесени битови и нивна КОРЕКЦИЈА, благодарение на дополнително внесените редундантни битови. Корегираниот дигитален сигнал е ИДЕНТИЧЕН на оригиналниот. Парадоксално, но проблемот со CD репродукторите е во нивната преголема чистота на звукот, бидејќи сите мали проблеми кои претходно биле маскирани и незабележливи, сега излегуваат на површина.