Како што е познато, главна задача на имунолошкиот систем е одбрана на организмот од бактерии и вируси. Во остварување на оваа задача заеднички дејствуваат голем број на различни крвни ќелии познати под заедничкото име леукоцити, како и некои регулациони супстанции, како што е факторот за раст, материи кои ги лачат овие ќелии. Леукоцитите, всушност, се различни типови на клетки во армијата на имунитетот. Секоја клетка има различна задача во битката: некои ги откриваат непријателите, некои ги ослабуваат со усовршени хемиски материи како оружја, некои ги уништуваат непријателите, а некои, пак, расчистуваат по битката. Така, со нивното заедничко дејствување се создава прва одбранбена линија која мошне тешко може да се пробие ако системот е во добра состојба. Но, како што старееме имунолошкиот систем е се послаб, а со тоа и одбраната, се разбира, пред сè, како резултат на намалениот број на леукоцити во целина или ако некоја група на клетки не ја врши задачата како што треба целиот систем е помалку ефективен или, поинаку кажано, системот паѓа.