Според компанијата тие го развиле првиот чип за квантни пресметки во својата класа. Оваа форма на пресметки теоретски би направила квантни скокови и во брзината и во бројот на пресметки што компјутерот би можел да ги изврши истовремено.

Физиката што теоретски би напојувала еден ваков чип е мошне тешка за разбирање, дури и за некои физичари. Имено, чипот користи нова состојба на материјата – ниту цврста, ниту течна, ниту гасна – за да напојување. Компанијата ги објави прелиминарните наоди од експериментите на овој нов вид материја, којашто тие ја нарекуваат „тополошки суперспроводник“. Но (и тоа е едно големо НО), компанијата сè уште нема дефинитивен доказ постоењето на ваков вид на состојба на материјата. Па оттаму и реакциите на веста објавена во Nature, во научните кругови засега варираат од срамежлив оптимизам до изразување на различни степени на скептицизам.

Една од добро утврдените научни максими е дека големите тврдења бараат големи докази. А тврдењето дека е откриена нова форма на материја секако дека би можела да се дефинира како големо тврдење.

Истражувањата во доменот на суперспроводливоста, чијашто крајна цел е да се овозможи спроведување на електричната енергија без никаков отпор на собна температура и побрзи компјутерски пресметки, и досега не беа без контроверзи (види тука и тука). Неколку објавени научни трудови во кои се тврдеше дека бил постигнат некаков облик на суперспроводливост се повлечени, а меѓу нив и оној од истражувачката група поврзана со Мајкрософт.

Како и да е, ако чипот што компанијата го нарече Majorana 1 и материјалот што го напојува ги поминат тестот на научната проверка и на крај стигнат на пазарот, тие би можеле да донесат револуција во ИТ индустријата.

Како работи Majorana 1?

Компанијата тврди дека тополошкиот суперпроводник ги прави електроните во материјалите отпорни на шум, што теоретски би овозможило струјата низ нив да тече непречено (читај без отпор). Новиот чип ќе го користи тој материјал како основна единица. Компанијата цели кон создавање на вакви основни единици што ќе содржат милион кубити (индивидувални целини што покажуваат квантни својства). Односно, поинаку кажано целта на компанијата е да создаде машина изградена од милион кубити.

Таквата машина теоретски би можела брзо да сработи огромен број операции.

„Сите актуелни компјутери во светот кои работат заедно не можат да го направат она што ќе може да го направи еден квантен компјутер од еден милион кубити“, се вели на веб-страницата на Мајкрософт.

Светот, а особено квантните физичари и научниците за материјали, нестрпливо чекаат повеќе докази дека една таква машина и навистина може да постои.

Извор Discover Magazine