Ултралесните авиони се светски тренд кој полека навлегува и во Македонија. Во ЕМИТЕР 7-8/05 и 9/05 ви го претставивме ултралесниот авион "Савана" направен во самоградба од страна на битолчаните Дејан Трајковски и Михајло Атанасов. Во овој број ви го претставуваме ултралесниот авион "МАЈА" во сопственост на прилепчанецот Дејан Пеливановски.

Од овој број "Небото над Македонија", нашиот водич за астрономите-аматери, ќе оди со нова концепција. Во текстот ќе ги нема оние "сувопарни" бројки за споменатите небески објекти, но затоа ќе има наши препораки што можете да гледате на ноќното небо со помош на голо око, обичен двоглед и аматерски телескоп. Веруваме дека со ова рубриката "Небото над Македонија" ќе биде многу поблиска до повеќето читатели.

Секој човек си има свој животен пат и своја приказна. На тие врвици избликнува дарбата и желбата да се успее во работа која за наши услови е несекојдневна. Кон тоа се надоврзуваат и егзистенцијалните потреби кои принудуваат на упорна и непрекината работа со денови и со ноќи. И во тие темни, непроспиени ноќи да се гледа светла иднина е одлика на луѓе кои не сакаат да им се поместат од патот на неволјите.

Деновиве од СЕТ компјутери добивме на тест четири МП3-плеери од производителот Inno Vision Multimedia Limited. Се работи за произведувач чија специјалност се мултимедија уреди и графички картички за PC, така што нашите очекувања не беа многу големи, но она што го добивме вистински нè изненади.

Микробрановата печка е еден од апаратите за домаќинство на кој се приоѓа со неоправдана доза на страв и недоверба. Дали има причина за таков приод ќе дознаете ако детално се запознаете со принципот и со основните правила за нејзината работа и начинот на севисирање за оние што можат и сакаат да се занимаваат со тоа. Ако сте сервисер на апарати за домаќинство, овој напис ќе го дополни и збогати вашето искуство.

Имајќи ја предвид малата големина на SMD отпорниците и кондензаторите класичното означување на нивната вредност станува невозможно, па затоа тие се обележуваат со троцифрен или четвороцифрен коден број или со комбинација на цифри и букви. Доколку не знаеме што точно претставува секоја цифра или буква, постои голема веројатност да погрешиме во отчитувањето на вредноста. Во овој напис ќе се запознаеме со најзастапените методи за означување на SMD отпорниците и кондензаторите.

Ова едноставно коло произведува звук сличен на ѕвонењето на фиксните телефони и претставува одличен пример за практична примена на осцилатори за правоаголен сигнал со операциски засилувачи.

Во ЕМИТЕР 5/05 прикажавме едно конкретно решение на комбиниран систем на електрично напојување составен од еден фотонапонски панел, ветерна турбина и два акумулатора од по 12V/130Ah, за прв пат инсталиран пред повеќе од четири години од страна на фирмата Сието во викендичка во општина Илинден. Во овој број ќе прикажеме друг начин на искористување на алтернативното напојување, овој пат не за потребите во домаќинството, туку за испумпување на вода и формирање на мала вештачка акумулација.

Некаде на почетокот на месец октомври, во јавноста храбро се појави 10.издание од популарната дистрибуција на Linux оперативните системи, SuSE Linux 10.0. Кога се одлучив да пишувам за оваа дистрибуција вниманието ми го одвлече фактот дека Novell (сопственикот на SuSE) се реши своето корпорациско издание на 10. верзија од оперативниот систем да го создаде како прво издание на openSuSE проектот.

Дали некогаш сте посакале да креирате WEB-страница што ќе претставува рај за очите на Интернет- посетителите. Нека снегот кој неодамна го имавме ви претставува инспирација за да ја направите вашата прва WEB-страница на која непрекинато ќе паѓа снег. Затоа не чекајте, облечете нешто потопло и започнете ја вашата снежна авантура ;-).

Во последно време на вратите од современата наука чука најновото интелектуално чудо - Теоријата за струните, претендент да ги обедини двете најголеми, но парцијални достигнувања на науката во 20-от век: теоријата за релативитетот и квантната теорија. Таа отвора можност за унифициран опис на сета физичка стварност за природата на светот, па ја нарекуваат и "'теорија за сè".