И покрај големиот развој на дигиталната технологија во Hi-Fi уредите, аналогните системи се сè уште застапени на светскиот пазар, а особено кај нас. Проблемот со шумот кој се јавува во сите аудио системи, а од кој боледуваат аналогните системи, решаван е на различни начини со помал или поголем успех. Влијанието на шумот е најдоминантен кај касетофоните каде шумот на лентата го ограничува односот сигнал/шум на 55-65 dB. Динамичкиот потиснувач на шум (Dynamic Noise Limiter - DNL), кој е прикажан во овој напис е усовршена верзија на Philips-овиот DLN и е поволен за употреба како со касетофони така и со останатите уреди за пренос на аудио сигнал. Уредот работи на принцип на промена на ширината на пропусниот опсег со ниско пропусен филтер во зависност од репродуцираниот материјал. При употреба со еден типичен касетофон се остварува подобрување на односот сигнал/шум за приближно 14 dB.