Fiat сака да ја прекине доминацијата на конкурентските автомобили во компактната класа. Како и со што? Со Stilo, автомобил кој се нуди во две каросериски изведби, со четири бензински и два турбодизелски мотори, со богата опрема, со високо ниво на безбедност, со употреба на квалитетни материјали во внатрешноста, со висококвалитетна завршна обработка и сето тоа понудено за конкурентна цена. Stilo, еден од најкомплетно обмислените, изработените и пласираните проекти на Fiat, е проект кој траел 48 месеци и во кој се вложени околу 900 милиони евра. Тој проект, едноставно, мора да успее. Со него, италијанскиот автомобилски гигант се впушта во беспоштедна борба на пазарот против конкуренти кои веќе години наназад успешно го наоѓаат патот до џебовите на купувачите.