Папајата (Papaya carica) е тропско растение, чија татковина се протега од суптропските подрачја на Чиле, Парагвај, Гватемала, јужниот дел од Мексико, јужна Флорида, па преку подрачјата на источна Африка, до Пакистан, Шри Ланка, Индија и Австралија. И покрај толку долгото познавање на папајата низ историјата, дури на крајот од 20. век, научниците што се занимаваат со лековити растенија, ја откриле нејзината важност, особено по откритието на папаинот, кој успеале да го изолираат од листовите и од незрелите плодови од папајата. Папаинот е, инаку, главна состојка на одбранбениот механизам на растението папаја. Со својата енормна сила ја штити папајата од различни микроорганизми и паразити, така што ова растение е едно од најотпорните на светот.