Со новиот закон за безбедност во сообраќајот, во кој спаѓа и задолжителното вклучено кратко (соборено) светло (не позиција), возачите поради сè уште нестекнатата навика на некој начин се наоѓаат помеѓу чеканот и наковалната. Ако не ги вклучат кратките светла - следува казна, а ако по возењето ги заборават вклучени, што многу често се случува, акумулаторот се празни. Токму тогаш, според "Марфиевиот" закон, обично сме во големо брзање и уморни, а возилото не може да се користи. Со празнење на акумулаторот под 10,5V тој губи од својот капацитет по што ќе мора да се купи најверојатно нов акумулатор (ако не сега, пред зимата сигурно). За да се избегнат сите овие нервози и беспотребно трошење пари, во овој напис ви нудиме проект за самоградба на коло кое автоматски ќе ги вклучи светлата по стартување на моторот и ќе ги исклучи по негово гасење.