Во голем број апликации со електронските термометри комплетно се заменуваат алкохолните или живините термометри. Електронските термометри многу побргу реагираат на температурните промени и исто така дозволуваат прикажувањето на температурата да е подалеку од сензорот, ова значи дека сензорот за детектирање на топлината треба да биде во близина на изворот на топлина, додека дисплејот на кој се прикажува температурата со електронското коло може да се наоѓа подалеку од изворот. Овие термометри дозволуваат поголема флексибилност при употребата. Во однос на конвенционалните се попрецизни, а нивната прецизност директно е зависна од сензорот. Овие електронски термометри, исто така, можат да се користат за мерење на температурата во поголемо температурно подрачје. Едноставно може да се каже дека опишаниот термометар во нашиов проект не е од последниот збор на техниката во однос на опсегот и точноста, но намерата ми беше да изработам електронски термометар кој ќе ја мери и покажува собната температура, а не да биде со професионални атрибути, а сето тоа значи многу поголеми вложувања за негова реализација со компоненти кои многу тешко ќе можете да ги најдете на нашиот скромен (да не кажам беден) пазар. Во нашиов електронски термометар температурниот мерен опсег е ограничен (лимитиран) на 10ºC и истиот се прикажува на скала-дисплеј со 10 лед диоди со чекор од 1ºC. Нормално, колото за цело време е исклучено за да се заштеди алкалната батеријата од 9V, а по потреба се вклучува преку тастерот TS1 кога сакате да ја отчитате температурата.