Ако Природата сакала човекот да борави само по земјата, ќе го всадела со длабоки корења, доколку сакала луѓето да летаат, ќе имале крилја како птиците. Творецот му дал избор на човекот, самиот да се определи.

Летањето на човекот отсекогаш живеело во мечтите и била негова омилена опсесија. Со поглед насочен нагоре копнеел да лета како птиците. Му требале само доволно големи крилја што ќе го понесат во воздухот, соодветно прицврстени на него и со можност за управување. Во реалноста, летањето романтично почнуваше од поединци, се развиваше во воената индустрија и бизнисот, и стана дел од човештвото. Крилата за слободно летање и ултралесните летала во масовно производство се појавија последни и се единствените нешта кои својата примена прво ја најдоа во цивилството – за забава, спорт и задоволство на луѓето, во една космополитска атмосфера и заедница. Главен стожер на оваа авијација кај нас и во регионот е “Хели Клуб” од Скопје. По повод педесетгодишнина од основањето на оваа важна институција за “лесни летала”, како ги викаа тогаш, ќе дадеме вовед во оваа спортска авијација.