Примерокот е дел од парчето карпа со тежина од 5,4 грама коешто јапонското вселенско летало Хајабуса2 го изгреба од површината на астероидот Ријугу и го врати на нашата планета во 2020 година.

Откако леталото слета на Земјата, истражувачите го отворија “пакетот” со примерокот од карпата во вакуумска просторија сместена во чиста просторија, со цел да се спречи било каква контаминација, за потоа примерокот да го складираат во просторија исполнета со азот под притисок. Издвоени примероци од карпата на крај беа ставени во канистри исполнети со азот и беа испратени ширум светот за анализа.

Секвенца од фотографии што ја илустрира ротацијата на Ријугу 

Но, се чини дека некаде попат, барем кај еден од примероците од оваа карпа, овие превентивни мерки не биле доволни. Научниците што стојат зад студијата објавена во Meteorics and Planetary Science, открија дека еден од примероците, кој бил вметнат во смола во Империал колеџот во Лондон во Велика Британија, на површината појавил филаментозни микроорганизми, кои мошне блиску се совпаѓаат со терестријалните прокариотски бактерии.

„Присуството на микроорганизми во метеоритите се користи како доказ за вонземски живот, но потенцијалот за терестријална контаминација го прави нивното толкување мошне контроверзно“, пишуваат истражувачите во студијата. „Откритието предупредува дека копнената биота може брзо да ги колонизира вонземските примероци, дури и ако се преземаат мерки на претпазливост за контрола на контаминацијата”.

Научниците  веќе долго време дебатираат дали “семето на животот” на нашата планета потекнува од тука или можеби дошло “од небесата”. Претходните анализи на метеорити пронајдени на Земјата открија дека некои од овие вселенски карпи содржат пет нуклеобази неопходни за развој на органски живот. Но, прашањето дали соединенијата дошле од вселената со карпите или пак тие метеоритите се контаминирале по нивното пристигнување на Земјата, долго време стои отворено. Мисијата Hayabusa2 претставуваше своевиден обид за добивање одговор на прашањето, и таа имаше делумен успех – делови од нејзиниот примерок содржеа амино киселини, па дури и нуклеобаза урацил.

Откако го примија нивниот примерок, кој беше испратен од Јапонија во Обединетото Кралство во неговиот контејнер, истражувачите ја скенираа вселенската карпа со помош на рендгенски зраци и не пронајдоа знаци од бактерии на неговата површина. Потоа, по три недели, тие го преместиле примерокот во смола, проучувајќи го повнимателно после една наредна недела со помош на електронски микроскоп за скенирање (scanning electron microscope, SEM).

Изненадувачки, нивните резултати откриле изобилие од стапчиња и филаменти од органска материја на површината од примерокот. Но, на разочарување на истражувачите, стапките на раст, облиците и ненадејната појава на бактериите се совпаѓаат со иние на микробите од Земјата, што укажува на тоа дека примерокот некако бил контаминиран откако бил сместен во смолата.

Ова значи дека примероците од астероидот мошен веројатно нема да понудат какви било недвосмислени сознанија за составот на површината на Рјугу. Но, и покрај тоа, не значи и дека нема ништо да дознаеме од нив. Освен потврдата за важноста на исклучително строгите процедури за деконтаминација за примероците донесени од вселената, истражувачите велат дека нивната студија, исто така, ја нагласува и неверојатната приспособливост на микробите – кои мошне брзо “го јадат” органскиот материјал од каде било, без разлика на планетата.

„Присуството на терестријални микроорганизми во примерокот од Рјугу потврдува дека микроорганизмите се најголеми колонизатори во светот и дека се вешти во заобиколување на контролите за контаминација“, пишуваат тие во трудот. „Присуството на микроорганизми во примероците вратени од вселената, дури и оние кои се предмет на строги контроли на контаминација, нужно не значи и дека е доказ за нивно вонземско потекло“.