Промената на тркалачките лежишта во машина за перење на алишта претставува веројатно најтешка сервисна операција кај апаратите за домаќинство. Имено, за да се дојде до лежиштата потребно е да се демонтирацелата машина . За разлика од нив, на пример, греачот лесно се демонтира, само треба да се отстра­ни задниот капак од машината.

Уште при првата промена на звукот на машината, која звуче­ше како фино гребење, ми стана јасно дека машината најверојатно има проблем со тркалачките лежишта од барабанот. Радијалниот зјај од 1-2 mm што се појави при поткревање на барабанот дефи­нитивно ја потврди дијагнозата, што бараше итно лекување – замена на тркалачките лежишта и семерингот.

Колку побрзо се изврши замената, толку подобри се прогнози­те за остаточниот век на машината. Никако не смее да се дозволи машината да прозвучи како хеликоптер или не дај Боже барабанот да испадне во казанот. Тоа може да предизвика тешко оштету­вање на ракавецот од вратилото на барабанот, да го искриви самиот барабан, да го оштети електромоторот, па дури и електро­никата на машината. Вратилото (оската) преку носач (така­наречен „пајак”) е поврзана за барабанот. Самото вратило се потпира на две лежишта, а погон добива на другиот крај, преку ременица. Странично нема други лежишта, казанот виси на две пружини и се потпира на два амортизери.

Бидејќи во нашата куќа никогаш нема влезено мајстор, се подразбираше дека поправката ќе ја извршам самиот. Впрочем ние радиоаматерите често сакаме да отвораме разни уреди за да се запознаеме со нив, а ако некаква компонента не се поправа, често ја кршиме за да видиме што има внатре. Тоа значи дека поправката ќе биде еден вид работа што долго време сме ја барале и најпосле сме ја нашле.

Машината немаше да пропадне после 2-3 перења од почет­ното оштетување, така што имавме време да ги испереме насоб­раните алишта, за да имам доволно време и без брзање да пристапам кон поправката.