Едно од најпрепознатливите имиња во светот на звучни­ците секако е британската компанија Bowers&Wilkins. Нивната репутација е заслужена пред сè во некои поранешни времиња кога логото B&W беше гаранција за висок квалитет, но во последниве години Bowers&Wilkins се претопи во котелот на просечните, односно се додворува на (не)вкусот на поголемиот дел од публиката, т.е. можните муштерии. Тоа може и да се разбере, бидејќи целта на секоја компанија е профитот, така што наједноставно решение за успех е задоволување на барањата, какви и да се тие, на поголемиот сегмент од публиката. Секоја сериозна компанија прави истражување на пазарот и ги анализира вкусовите на публиката, па така уште поодамна се знае дека она што го бара поголемиот дел од не-аудиофилската публика е звучник што има истакнат високо­тон­ски спектар, заедно со нагласен дел од ниските тонови околу 100 Hz. Тоа е во остра спротивност со природниот и неутралниот звук што го бараат аудиофилите, но тие се занемарливо малцинство и не носат многу пари во касата на производителите на звучници.

Амплитудно-фреквенциска карактеристика на B&W DM603 S2

Амплитудно-фреквенциска карактеристика на B&W DM603 S2 со модифицираната свртница

Некои компании, како што е Bowers&Wilkins, сепак не го напуштаат тој мал аудиофилски сегмент, но затоа финансиски го компензираат тоа целејќи најмногу на најскапиот high-end програм, наплаќајќи висока цена на своите производи. Сегментот на нивни производи со средна цена заинтересираните го перцепираат како да е близок до, или барем инспириран од, нивниот high-end произ­воден програм... и тука е можно да настанат некои заблуди и изневерени очекувања. Звучниците од серијата 600 на Bowers& Wilkins се на почетното скалило од средната класа на нивни­те производи, па многумина се надеваа дека за рела­тивно мали пари ќе вкусат барем некој мал дел од тешко достапните high-end височини. Да видиме дали звучниците Bowers&Wilkins DM603 S2 ги оправдаа тие очекувања.