Комбинираните бојлери се бојлери кои санитарната вода можат да ја загреваат на два или три начина. Првиот начин е со електричен грејач како и кај сите класични бојлери. Вториот начин е со користење на топлината на системот за парно греење, а третиот преку соларни панели. Сите комбинирани бојлери имаат приклучок за користење на еден од алтернативните извори на топлина, но постојат бојлери кои истовремено можат да се приклучат на двата. Кога комбинираниот бојлер за загревање на водата ја користи топлината на парното греење, во ноќните часови кога низ системот за парно греење има само циркулација може да се случи парното греење потполно да ја олади водата во бојлерот. За да се елиминира оваа несакана појава, потребен е диференцијален термостат кој ќе го исклучи бојлерот од системот за парно греење кога прирастот на топлинска енергија во бојлерот е негативен. За цена поголема од 6000 денари, на нашиот пазар може да се најде диференцијален термостат наменет за комбинирани бојлери. За многу помалку пари тој може и да се изработи, и тоа со тајмерот 555. Не сум најдобро запознаен со карактеристиките на фабричките диференцијални термостати, но сметам дека и евтината 555-ка во целост може да ги задоволи барањата за оптимално искористување на топлинската енергија на парното греење.