Бучавата, која во човековата околина се наголемува од ден на ден е последица на современиот начин на живеење. Човекот е изложен на бучава на работното место, во урбаната средина, најчесто во станбената средина во која престојува, па дури и во својот стан. На сето тоа треба да се додаде и зголемената бучава од сообраќајот и зголемениот број на различни бучни уреди во домаќинствата и деловните објекти, а особено од оние од угостителско-трговски карактер: кафулиња, кафеани, летни бавчи, ноќни клубови, дискотеки итн. Денес е сè потешко да се заштитиме од несаканата, прекумерна бучава и да се обезбеди задоволувачка заштита од бучава барем во станбените простории и во тие простории да се овозможи непречен престој и мирен сон.