Многумина од вас на покривите од куќите и зградите ги забележале големите бели чинии за прием на телевизиски програми - тоа се т.н. параболични антени за прием на сателитски телевизиски и радио програми. Но, сигурно се прашувате кои се тие ТВ и радиопрограми што можат да се следат со овие антени, каква додатна опрема е потребна во состав со овие антени, каде можат да се купат, колку чинат и др. Во следниот текст ќе се обидеме да ве запознаеме со основата на сателитската телевизија како и со неопходната опрема која треба да ја поседувате доколку сакате да впловите во водите на сателитската телевизија, а со тоа и да ја прекинете досегашната монотонија што ви ја нуди вашиот телевизиски приемник.