Дигиталниот пренос на гледачот ќе му овозможи многу поголем избор при гледањето на програмата. Во спортот на пример гледачот сам може да го одбере аголот на гледање од четири можни, а може и истовремено да ги набљудува на екранот сите четири дела. Вакви системи од скоро се нудат во западна Европа. Со ова, во ТВ системот се воведува и доза на интерактивност, затоа што гледачот може сам да ја режира програмата. Ако во системот се вметне и модем, со помош на телефонска линија може да се воспостави и повратна врска. Со ова гледачите многу ефектно и едноставно можат да се вклучат во гласање за разни избори и натпревари.

Инженерот на Кодак, Стивен Сасон, ја држи првата изработена дигитална камера што токму тој ја дизајнирал

Покрај овие "козметички" предности, дигиталната телевизија нуди и исклучително квалитетна слика, скоро на ниво на студиски квалитет. За ваквиот сигнал успешно да се пренесе до гледачите , потребен е пренос од 10 до 15 Mbit/s. Со оваа брзина сигналот на приемот е значително послаб од оној во студиото. Ако на истиот носител се емитуваат повеќе канали сигналот губи во квалитетот, но сликата е доволно добра дури и при 8 сигнали на еден канал.

Сигурно е дека многу ТВ-програми ќе бидат скремблувани за да се обезбеди претплата на дадените услуги. Од други можности тука е и компјутерскиот приклучок за репрограмирање и сервисирање, но и MPEG2 дата излезот за компјутер кој овозможува зачувување и обработка на сигналот.

Единствени на кои новата технологија не им одговара се сервисерите кои тешко ќе се снајдат со толку сложени и софистицирани уреди, но тоа е мала жртва за она што новата технологија го нуди.

Сакале вие или не, дигиталната телевизија сигурно доаѓа.