Сигурност пред сѐ! Најкусо вака би можело да се дефинира постоењето и задачата на програмата за проценка на нови автомобили, односно EuroNCAP (New Car Assessment Program). Оваа независна комисија на чие чело е претседателот на FIA (Светската автомобилска федерација), Макс Мозли, формирана е од Европската заедница на почетокот на 1997 година. EuroNCAP е една од главните причини поради кои автомобилските гиганти сега се борат за доминација на полето на сигурноста, поим кој до пред неколку години се поврзуваше само за неколку реномирани автомобили.

Безбедноста и сигурноста се едни од најважните фактори при конструирањето на новите автомобили. И купувачите, нив високо ги позиционираат на својата листа на приоритети при изборот на својот нов автомобил. Во последно време, токму како резултат на EuroNCAP тестирањата, податоцитеза перформансите на автомобилот задолжително се проследени и со ѕвездичките добиени од оваа асоцијација како силен маркетиншки адут.

Важно е да се напомене дека автомобилите кои се тестираат се стандардно опремени и се набавуваат од случајно одбрани автосалони. Идентичноста со автомобилите достапни за обичните купувачи е загарантирана. Принципот на тестирање не дозволува специјално подготвени и посебно опремени автомобили. Широката прифатеност на резултатите од EuroNCAP само ја потврдува неутралноста и фер односот при тестирањата.

Во овој напис збориме за историјата на EuroNCAP, за тоа што и како се тестира на EuroNCAP краш-тестовите, даваме преглед на резултатите од последните краш-тестови, и што е најважно, говориме за значењето на резултатите од овие тестови при изборот на нов автомобил.