Електрична жица која се загрева до 300°C со помош на електрична струја, а е наменета за сечење на полистирен (polystyrene) и негови сродни материјали, наречена е термоелектричен или термален нож. Како што загреаната жица навлегува низ материјалот, материјалот веднаш испарува на местото на допирот и на тој начин механички се раздвојува, т.е. се сече. Во основа, секој термален нож е составен од отпорна жица низ која протекува електрична струја која го загрева и механички држач на кој е добро прицврстена и затегната самата грејна жица. За добра регулација на температурата на грејната жица потребен е електронски уред кој ќе врши промена и контрола на електричната моќност која се доведува до отпорната грејна жица.

Контрола на моќноста на електричната енергија, а со тоа и контрола врз температурата може да се врши на неколку начини: со сериски променлив отпорник (реостат) кој ќе ја менува јачината на струјата која протекува низ грејната жица; со промена на приклучениот напон врз краевите на грејната жица со помош на некој од сериските регулатори за промена на напон; со менување на напонските изводи на секундарот од трансформаторот, при што се менува доведениот напон врз отпорната жица и со промена на времето на спроведување на струјата низ грејната жица, т.е. променлив однос импулс/пауза или duty cycle. При конструкцијата на уредот за промена на јачината на струјата, а со тоа и за промена на температурата на жицата за загревање, употребен е последниот начин, поради големиот коефициент на корисно дејство и малата термичка дисипација во излезниот транзистор.