Компјутерските вируси претставуваат програми кои се креирани најчесто со лоши намери. Терминот "вирус" неслучајно се користи во информатичката терминологија, притоа посочувајќи токму на овие апликации и покрај тоа што оваа асоцијација е само симболична и нема ништо заедничко со биолошките вируси. Компјутерските вируси се однесуваат слично како и биолошките (размножувајќи се, можат да бидат прикриени и да се активираат во одреден момент, тешко се откриваат, некои дури можат и да мутираат и слично), па оттука и името вирус. Во овој како и во наредните написи, ќе зборуваме за нив и ќе се потрудиме да ве запознаеме со начинот на нивната работа, како и со начинот на кој можете да се заштитите од дигиталните верзии на биолошките вируси. Исто така ќе ги споменеме и останатите програми напишани со цел да направат некаква штета а не спаѓаат во групата на вирусите, како што се т.н. црви, тројанци и временски бомби.