Колку што ми е познато, единствениот производител на ова интегрирано коло, Philips, до сега ја нема објавено неговата детална електрична шема, и се чини не случајно. За да биде целата приказна уште поинтересна треба да се истакне дека некои реномирани производители на аудиоопрема, како што е Cambrige Audio, истото масовно го вградувале во своите комерцијални производи, што е многу редок случај, ако не и единствен со толку големо значење. Атрибутите со кои се опишува звукот на ова коло неодоливо потсетуваат на оние кои редовно можат да се слушнат исклучиво за засилувачите со електронски цевки. За жал, од пред извесно време ова коло не е повеќе во редовно производство, но за среќа, кај нас сè уште може да се купи во подобро снабдените продавници за електронски компоненти. Оние кои веќе го поседуваат, од овој момент можат да се чувствуваат привилегирани. Пред да започнеме со описот и објаснувањата, уште само неколку зборови. Целиот проект е замислен да биде лесен и достапен за секој хоби-електроничар кој поседува основни познавања и вештини од електрониката. Како што е вообичаено за секој проект, внимателно следете ги упатствата, и нема да имате поголеми проблеми при неговата реализација. Што се однесува до звукот на овој засилувач можам да кажам дека уште при првото слушање е повеќе од јасно дека се работи за засилувач со посебен карактер кој се издвојува од останатите монолитни засилувачи. Ширината и длабочината на звучната слика се зачудувачки големи. Ниту еден дел од звучниот опсег не е претерано нагласен или повлечен. Постои одличен баланс во целиот спектар и многу добра реконструкција на просторот од сцената. За разлика од конкуренцијата, слушањето на музика со овој засилувач е пријатно и ненаметливо и после неколку часа, што според мене е негова најдобра особина.