Перформансите на еден компјутерски систем зависат од многу фактори, но еден од клучните е работната фреквенција на процесорите и мемориите на одредени хардверски компоненти. Со зголемување на фреквенцијата линеарно растат и перформансите. При тоа, без оглед дали станува збор за ист модел од ист производител или не, максималната фреквенција на која секој од нив може стабилно и исправно да работи е различна. Затоа, производителите го делат  хардверот во неколку категории кои задоволуваат одредени минимуми и услови. Така, секоја категорија е предвидена за различни модели на произведуваните компоненти, кои можат да се разликуваат во перформансите, квалитетот, енергетската ефикасност и др. За секоја категорија, производителите одредуваат номинални работни фреквенции, но секогаш оставаат простор до максималните можни фреквенции на која било компонента од таа категорија.

Ладилник за AMD K8 sAM2, Scythe Ninja Plus rev.B AM2

Бидејќи сме ограничени со просторот, најмногу ќе зборуваме за стабилен и безопасен оверклок на модерните системи и хардверски компоненти. Ентузијастите најчесто оверклокуваат евтини системи со релативно послаб хардвер, при што постигнуваат ниво на перформанси од не-оверклокуван врвен систем (кој е многу поскап). Интересни компоненти за оверклокување се процесорите, графичките картички, чипсетите од матичните плочи и меморијата. Пред детално и поединечно да се осврнеме на конкретни модели од хардверот, интересен за оверклокување, ќе обрнеме внимание на основните и заеднички услови кои треба да бидат исполнети и принципи кои треба да ги почитуваме кога оверклокуваме.