Следејќи ги потребите на своите конзументи, големите компании кои произведуваат канцелариски уреди веќе одамна ја увидоа потребата од мултифункционални уреди. Гигантот Hewlett Packard е еден од лидерите во оваа област, па така компанијата на пазарот нуди повеќе серии All-in-One уреди. Се работи за уреди кои извршуваат повеќе функции, почнувајќи од печатач па сè до скенер, копир и факс. HP Officejet Pro 8500 Wireless мултифункционалниот уред, кој деновиве пристигна на тестирање во нашата редакција, припаѓа во самиот врв на уреди од оваа класа. Со своите врвни перформанси и шаренилото од можности, овој уред многу бргу и лесно ќе го пронајде патот до целната група корисници, првенствено бизнис-корисниците.