Оперативниот систем Windows Vista веројатно никогаш нема да ја постигне популарноста на својот претходник Windows XP. Застапеноста на Vista, барем кај нас, сè уште е многу мала. Лично мислам дека причини за тоа има повеќе. Ако земете за пример тоа дека секоја нова верзија на кој било популарен софтвер од областа на графика или нов антивирус софтвер, ќе биде пречекан од корисниците со раширени раце, тоа воопшто не е случај кога се работи за нов оперативен систем. Просечниот корисник во принцип тешко се одлучува за премин кон нов оперативен систем од едноставна причина - зошто да се менува нешто што одлично функционира и што е веќе добро познато! Но, времето неминовно носи промени, и веројатно сè повеќе корисници ќе се одлучуваат за Windows Vista.